تعرف إن فيه مخلوقات في البحر مرعبة لدرجة الأساطير؟ بقلم محمد صاوي
انت في الصفحة 1 من 5 صفحات
تعرف إن فيه مخلوقات في البحر مرعبة لدرجة الأساطير؟
خليني أصدمك وأقول لك إنك كل ما هتنزل تحت في البحر وتتعمق، كل ما المخلوقات اللي عايشة فيه بتزيد رعب وشراسة.
علشان كدا هتلاقي دايمًا الإنسان له حدود ميقدرش يتخطاها، لأنه لو حاول يتعدى الحدود دي، هيقابل شيء بشع مش هيقدر يستحمل بس رؤيته.
الإنسان دايمًا شغوف لاكتشاف العالم، ومعرفة خباياه، اتخلق بالشكل دا، عنده فضول دائم لزيادة المعرفة، وقدر مع الزمن يعرف حاجات كتير، ويصنع أشياء تساعده على معرفة الكون.
ومن ضمن اكتشافاته، كان عنده حلم إنه يعرف أعلى نقطة على كوكب الأرض، وقدر يوصل لجبل إيفريست، اللي ارتفاعه بيصل لـ8848 متر، ولكن مكنش عنده الإمكانيات الكافية اللي تمكنه من اكتشاف أعمق نقطة على سطح الأرض!
تخيل معايا إنك لابس بدلة غطس، ونزلت غطست في المحيط، بتحس بضغط غريب في جسمك، وبتحس بعدم اتزان، وإن جسمك هينفجر، لأن ضغط المياه كل ما العمق زاد بيكون صعب جدًا تحمله، حتى لو على سفينة غطس.
ولكن مع الوقت قدر الإنسان بالعلم والتكنولوجيا إنه يكتشف أعمق نقطة على سطح الأرض، وهي خندق ماريانا، ولكن مقدرش يعرف كل حاجة عن مخلوقاته.
وعلشان تتخيل مدى عمق الخندق، تخيل معايا إننا خدنا جبل إيفريست وغرقناه في الخندق، عارف هيحصل إيه؟! الجبل كله هيتغرق وهيفضل مساحة 2 كيلو متر مياه فوق!
يعني عمق الخندق حوالي 11 كيلو متر.
الخندق مرعب، مبيحملش في جوفه غير كائنات متوحشة، واللي لحد دلوقتي مش عارفين نكتشف معظمها، منخفض عميق جدًا في قاع المحيط على شكل حرف "V"، مكانه في غرب المحيط الهادي بالقرب من جزر الماريانا، اللي يُقال إنه اتكون من تحركات الصفائح التكتونية نتيجة للزلازل على مر التاريخ، ويُقال إن الخندق عمره أكتر من 170 مليون سنة، ودا بيرجح إنه أقدم مكان وأعمق مكان على سطح الأرض!
خلي بالك، احنا هنا في أعمق نقطة على سطح الأرض، أكتر مكان مظلم اتخلق!
ولازم تعرف قبل ما ابدأ إننا قبل ما نكتشف خندق ماريانا كان لنا اكتشافات عظيمة وعميقة في المحيطات، زي اكتشاف المحيط الشمالي المتجمد، والمحيط الأطلسي، والمحيط الهندي، والمحيط الهادي.
وقدرنا مع الوقت نعرف أعمق النقط اللي في المحيطات على الأرض، زي حوض أوراسيا في المحيط الشمالي المتجمد ودا عمقه 5450 متر، وخندق جافا في المحيط الهندي عمقه 7725 متر، وخندق بورتو ريكو في المحيط الأطلسي ودا عمقه 8648 متر.
ولحد وقت قريب كنا فاكرين إن أعمق نقطة على سطح الأرض هو خندق بورتو ريكو، لحد ما قدرنا نكتشف خندق ماريانا اللي في المحيط الهادي وبيبلغ عمقه لـ11033 متر!
ولكن!
إيه هو الخندق؟
وليه مرعب بالشكل اللي بيصدره الإعلام العالمي؟
تعالى معايا، وأنا هقول لك… يتبع
