رواية اختفاء كاملة الفصول
انت في الصفحة 1 من 4 صفحات
الفتره الى فاتت انتشر موضوع كده على السوشيال ميديا الى هو بيجيبو الطفل الصغير ويحطو ملايه قدامه كأنهم بيخفوه وبعدين الولد يقعد يعيط يفتكر أنه اختفى فعلًا ومش عارفين يرجعوه، الصراحه الموضوع عجبنى جدا فجبت اخويا الصغير رامى وجبت بابا وماما وفهمتهم الى هعمله وقلتلهم يعملوا كأنهم مش شايفينه بعد ما اشيل الملايه عشان نشوف رد فعله وكده،
المهم جبت رامى وقعدته على الكرسى ورفعت الملايه وبدأت اقول اى كلام بس على الحظ النور قطع ثانيه بس وجه على طول فقلت كويس عشان تحبك الخدعه فببص على اهلى وهما مظبطين وشهم على وضع الضحك على رامى وبعدين بشيل الملايه بس ملقتش رامى !!
الغريبه أن انا متفقتش معاه أنه يستخبى ولا حاجه المهم اهلى فهمو انه استخبى عشان يمثل عليهم أنه اختفى يعنى وكده فقعدوا يهزروا ويقولوا ايه ده فين رامى ؟! ايه ده.. ده اختفى فعلًا !! وعمالين يبصوا لبعض ويضحكوا، بس فضل مستخبى فتره كبيره، فشاورولى ففهمت أنهم عايزينى اعمل كأنى برجعه فحطيت الملايه وعملت نفسى بقول كلام عشان ارجعه بس رامى مطلعش !!
